Kominn í Melasveit

Í gær gekk ég frá Bændaskólanum á Hvanneyri og eftir vesturlandsvegi inn að afleggjaranum að Melasveit og að bænum Melar. Veðrið var frábært 19 gráðu hiti og sól. Frábær dagur.

Kominn að bændaskólanum á Hvanneyri.

Eftirfarandi er gönguskipulagið næstu daga fram að lokum göngunnar á laugardag:

Dagurinn í dag  Bændaskólinn Hvanneyri- Melar í Melasveit
Miðvikudagur Melar Melasveit-Hvalstöðin Hvalfirði
Fimmtudagur Hvalstöðin Hvalfirði-Tíðaskarð
Föstudagur-Tíðaskarð-Hringtorg fyrir neðan Mosfelsbæ
Laugardagur Hringtorg fyrir neðan Mosfellsbæ-Lækjargata

Kominn 8 km frá endanum á Mýrum

Þetta er búið að vera róleg helgi á Mýrunum og aðgerðarlítil. Það voru nokkrir sem löggðu lykkju á leið sína og jafnvel komu frá höfuðborginni til þess að heilsa mér. Ég geng framhjá Borgarnesi á MILLI 13 OG 1400 í dag fyrir þá sem hafa áhuga á að labba með mér. 2276 km komnir

kominn 24 km inn á Mýrar

Kominn á Mýrarnar. Þessi kafli er tiltölulega fábreytilegur en það er gaman að lítið er eftir. Gaman að hafa 2 aðstoðarmenn í dag Það var Fúsi og kærasta hans Randý sem hugsuðu bæði um mig í stoppum. Tek stór skref núna og hvíli eftir hverja 10 km. Millitíminn er góður eða rétt undir 1 klst með hvern 5 km. 2246 km eftir.

Kominn að afleggjaranum að Mýrum

Síðustu dagar eru búnir að vera viðburðarríkir og enginn tími til þess að blogga eða gera nánast neitt nema að labba. Mikið af fólki labbaði með mér frá Hellnum og að Mýrum. Þegar ég var kominn ca 14 km frá Vegamótum á Snæfellsnesi þá tók ég mér frí í 2 daga síðustu helgi og vörðum við Fúsi fríinu í hinum eina sanna kaupstað Reykjavík í fyrsta skiptið í 3 mánuði. Flest kaupstaðarmál voru afgreidd  þá. Síðan var förinni heitið á suðurland og ég gekk þar 95 km sem ég skildi eftir í fyrra undir Eyjarfjöllum og Landeyjarnar voru gengnar. Í dag byrjaði ég að ganga þar sem frá var horfið 14 km frá vegamótum og endaði við afleggjarann að Mýrum. Tek frí á morgun og byrja endasprettinn til Reykjavíkur á Laugardaginn.

Endaði 7 km frá Hellnum

Þjóðgarðsverðir löbbuðu með mér í dag fyrstu km. Ég byrjaði í frábæru veðri en fljótlega skall á þoka og mikíð rok. Ég gekk síðan útúr rokinu og í mjög gott veður sem varði helmingin af leiðinni. Við Fúsi komum við á Hellnum og fengum okkur kaffi og kökusneið. Fann fyrir mikilli orku þegar ég var kominn á móts við Hellnar. Kanski vegna jökulsins? Ég hef fundið þessa tilfinningu áður í ferðinni og það var undir Gunnólfsvíkurfjalli á Langanesi í vor. Ég er ekki einn af þeim sem trúir á yfirnáttúruleg fyrirbæri og ég tel að þessi tilfinning sé sprottin af einhverjum aðstæðum sem skapast og virka svona á lðíkamann. Það væri gaman að geta skilgreint þessar aðstæður betur og búið þær síðan til þegar á þarf að halda.

2000 km múrinn fallinn

Kominn upp í 2020 km eftir daginn í dag. Ég fór 30 km í gegnum 3 þorp á Snæfellsnesi Ólafsvík, Rif og Hellissand. Fólk kom og labbaði með mér á þessum stöðum. frábært gönguveður. Ég endaði 9 km fyrir utan Gufuskála og það má segja að ég sé búinn að klára Breiðafjörð því að ég er kominn nær Faxaflóa en Breiðafirði.

Persónulegt met slegið 40 km dagur

Ég byrjaði í Álftafirði og gekk Helgafellssveitina og endaði í botni Kolgrafarfjarðar á Snæfellsnesi alls 40 km í frábæru veðri. Heildarvegalengd 1960 km. Ég og Fúsi aðstoðarmaður gistum nú í góðu yfirlæti á Hótel Stykkishólmi

Kominn inn í Álftafjörð

FÍ gær tók ég 5 km og fórum við Fúsi síðan í kaupstaðarferð til Stykkisholms og lukum verkefnum sem við getum ekki gert um helgi. Frábært veður í dag. Endaði í Álftafirði á Snæfellsnesi eftir 30 km labb á góðum tíma eða 6 tímum og 28 min sem er minn besti tími til þessa. Er að gæla við það verkefni að bæta persónulegt met hjá mér á morgun og labba 40 km. Læt vita annað hvöld hvernig til tókst. Heildarvegalengd er komin í 1920 km.

Kominn á Snæfellsnes

Gekk 17 km eftir Skógarströnd og í gegnum Búðardal í dag. Veðrið var sæmilegt. Tempóið var mjög gott eða rétt rúmlega klst með 5 km í öllum 5 km á 30 km degi. Ánægður með það.  Fer framhjá gatnamótunum að Stykkishólmi á sunnudag og í gegnum Grundarfjörð á mánudag fyrir þá sem hafa áhuga á að labba með mér. Ég geng í gegnum 2000 km múrinn á næsta þriðjudag. Búinn með 1885 km í sumar.